قصيدتين للزجال المقتدر ادريس بلعطار. الأولى تحت عنوان "برية ورقاص" والثانية تحت عنوان " خاص المداد بحر. برية... و رقا ص صباح الخير عليك يا عسل الشهدة من قطران شاط فالعزلة زادي صباح الخير عليك يا...
قصيدتين للزجال المقتدر ادريس بلعطار. الأولى تحت عنوان "برية ورقاص" والثانية تحت عنوان " خاص المداد بحر.
برية... و رقا ص
صباح الخير عليك
يا عسل الشهدة
من قطران شاط فالعزلة زادي
صباح الخير عليك
يارحيق الوردة
شواكها مغروسة-خلوق-فنشادي
صباح الخير...
بيك تسفال
هاذ لمقال
ولقصيدة عطفت
بلا دخال*
فكت خبالي
فكت حبالي
وفكت الخطوات من قيادي
صباح الخير...
على الريق
قبل شيطانك ما يفيق
قبل نجمة ومشبوح
قبل الزهر ما يفوح
قبل الهلال...والكلال
وقبل الطير ما يعاندني فتغرادي
كان عليك تجيني
كيف جيتك أنايا
جابتني ولفية والشوكـ ما منو خصاص
كان عليك تجيني
كيف جيتك أنايا
لقليب منو برية
ليك انتيا، ومنو رقاص
هي لجوارح ايلا حنات
تنسى اللومة
وليك تسيرتسرب فلخطوات
تنسى اللومة
وليك تقول:آجي... نبداو من ها ذي
كيف جيتك أنايا
ساعة يبست احلامي
وشوفتي حرزها الظلام
ساعة عقر كلامي
ولساني عافتو لنظام
وهكاك و لاغيتك...
لاغيتك بهبال روحي
لاغيتك بقوافي جروحي
بجمرة مزندة ضلوعي
لاغيتك برماد دموعي
وناديت ...ناديت وما عييت ﱠنادي
كان عليك تجيني
فصيفة لبدة
وحايك مغزول سدا فسدا
تدفا الخاطر..روحي تهدا
وﱠلا تجيني :كاسين ندى
واحد نبدل بيه صباحي
من تخمة نواحي
والثاني بيه سعدي يبدا
وشمس نهاري...
حر صهدها يصير عادي
كان عليك تجيني
غراس فمراس
وحق معزول للي بات عساس
وخطاتو فالوجد عدة
ولا تجيني ...دوا لهذ الدا
دون رحمة خسف مراحي
قلل ضحكي ومزاحي
ولا تجيني فصيفة نكدة**
ساعة صامت طياري
و خطاتني بعد الصيام عيادي
صباح الخير عليك
سوى تلاقينا... سوى غاشيك
خطر فلخاطر
راني مسولك كيف بقيت
مسولك بلجهرومسولك فلخاطر
مسولك وانا المطعون:
كبقيتي وكبقات الخاطر في هاذي
صباح الخير عليك
قد سلمتي قد عفرتي
قد انتي اللي كنتي
قد النظر كذب الناظر
راني نعرفك من لون ترابي
راني نعرفك من ريحة شعابي
ونقول: انتي
نبايعك بالجهر
نبايعك فالخاطر
نقول انتي
نلومك انتي
ونسولك انتي:
مال حوالك حالو؟
مال عطوبك طالو؟
ومال صباحك مالو؟
عاد...
كيف مساك يا بلادي؟
هوامش:
* الساعون لدى الزوجة الغاضب، بغية عودتها لبيت الزوجية.
**مفرد نكد وهي الحبوب التي تنثر للطيور الداجنة.
خاص لمداد... بحر
خاص صبر على حد و
خاص اكبر
خاص عمر على كد و
خاص اكثر
قالها موال
بمقام هبا ل
على حلمة مكسحة
ما بغات تسحى
ما بغات تمحى
سكنات البال
ﮐ عقلان الصغر
قالها موال
بمقام هبال
على كية :
جمعت كواوي كبالة
خبار...وجابوها توالة
فايتة قياس المحنة
و قياس طعنة في ظهر
قالها موال
بمقام هبال
على دم:
بهات لونو وتبالى
في لعروق عاد غسالة
بارد...سارد
جامد...هامد
هاذ الدم
و بمحراب الخاوة كفر
خاص لقلام ... ايلا عدوا
تكون حجر
خاص لمداد ...ايلا زهدوا
يكون بحر
قالها حرف
جا يوصف
شحال من نخصة في الروح
شحال من سكتة في البوح
و شحال من قرحة
في شحال من خاطر تنزف
قالها حرف
جا يوصف
شلا معاني
تعامات بالعاني
وهزات لكتف
دايرة الليد:
مع تمتيمت الشداق وضيقت الصدر
دايرة الليد
مع بيوضت لوراق وتيهت السطر
دايرة الليد
مع شوفة في لخوى
مع ﻋكاز خطوة
تتلوى...تتنوى...تتخوى
وخايفة تخلف
خاص الدموع ايلا بردوا
تكون جمر
خاص العلات ايلا ركدوا
يفيقها ضر
قالتها راكوبة
بشوفة محسوبة
على ﺴكوعيت ليام:
اللي فات... اللي باقي
واللي جاية فلسقام
على غمام
يبان حمام
جايب التحريرة في تابوت
جايب لكبولى في ساروت
ياك...وجايب السيبة حكام
قالتها راكوبة
بشوفة محسوبة
على طرقان مزروبة:
طريق تجري على طريق
وطريق تحفر لطريق
طريق سارقاها طريق
وطريق خارجة الطريق
طريق كابة في طريق حداها طريق
وطريق تفرت على طريق تردها للطريق
ايه...ايه...
قالتها راقوبة
بشوفة محسوبة
على هذ الطرقان
على هذ التيهان
وعلى شحال من مشية مغلوبة
خاص لعناد على عندو
فلحظة يكسر
خاص المحال على بعدو
بخطوة يحضر
قالتها ديك لعناية
كانت معاك ومعايا
آثرها غبر
كانت طوع و طاعة
كان غلبها ولاعة
وخسرانها نصر
كان سرها في بهاها
هبة وبلاها
طبيعة تخسر
آش يخص لرضاها؟
باش من حال ﺗﻠقاها؟
وملوكها تظهر:
خاص صبر
خاص عمر
خاص كبر
خاص كثر
خاص الشموع فجر
خاص الدموع جمر
خاص لقلام شلا
خاص لحروف محلة
خاص لمداد بحر...
أنت غير مسجل في منتدى مطر . للتسجيل الرجاء إضغط هنـا
رد
العرض العادي
