سـولـت حـروفـك

بنعيسى الحاجي · 04-04-2009, 10:48 PM

الى الزجالــة الهـــام بصفـــا

سولت حروفك عليك

سولت حروفك عليك ... بغيت نعرف شكون تيكرهك ... وشكون تيبغيك
شي ﯖـال موالفك وشي ﯖـال غير تيرضيك
حروفك بغاوا الليلة ساعفهم الله يهديك

شي ﯖـال معدبانا ... وشي ﯖـال مشطحانا ... وشي ﯖـال راحتهم فيك
وشي ﯖـال امنا مربيانا ومتهليا فينا ... واكلين شاربين ومساريين
لكن ف سواق الناس داخلين
حاضيين شكون غادي وشكون جاي

مرة مرة كتحماق وكتجدب وكتحير
وشي مرة كتفافا وكتدير راسها شوافة
وكتـﯖول كلام معجون بالمعنى
فران الحومة كلو عوافي
يطيب الطروح
لمليح بحقو
ونسيم الصباح ما يدري الدرسة
العقبة واقفة ولحدورة زرابة
واللي ضرباتو يدو ما يبكي

الزمان تبرى وجوادنا دواوا
ﯖالوا شلا معاني وكلام
الأرض كواغط
ولمحارث اقلام
لقوافي نابته
حاملة نقايم ليام

آشتف هاي تف
لكبير تلف والصغير تلف
والهام ما بقات تعرف
بنادم الغافل من لفطين
مرة تبكي مرة تزغرت
مرة تقفز الكتفين
مرة تحلم كتحكم
وتـﯖول نتما معايا خدامين
وشغلكم برﯖـاﯖـه
او احسن نسميكم بصاصين

الحرف منجل تيحصد تبن وربيع
ويلا جدب وتحير يهيج ...ما بقى فيه ما تردع

والحـر بالغمزة
اليد وحدها ما تصفق
والصمت حكمة ومنو تفرقت لحكايم
كون ما برﯖم ولد لحمامة
ما يجيه لحنش هايم

سال لمجرب لا تسال الطبيب
واللي ضربتو يدو ما يبكي

وحنا علاش هنا علاش
واش ما شفناش او ما حسيناش

ماشفناش اللي عاشر لحروف
حتى والفها فطماتو وما علماتوش
ما شفناش اللي غمزاتو لمواج
عانقها وما رحماتوش
علاش وعلاش وعلاش
بغينا نكتبوا مالقينا باش
بغينا نرسموا ما لقينا فاش

:::

إلهام بُصفا · 04-04-2009, 11:22 PM

حروفي مالْها تجذب وتلالي؟

خاصها الحرملْ ..البخور و الجّاوِي

الليف سيدهم واللاّ مسرار العيساوِي

طحت فْ حفرة الْيَ .. واجّا ما خرّجْنِي

من غيرْ إلى جذبتْ حروفِي قدّامي وْ تفرّجْنِي

ولى وقفت من الجذبة أيْ أيْ غادي تعرّجْنِي

إلهام بُصفا · 04-04-2009, 11:24 PM

فِيَ دعوَة

فِيَ دعوَة.. ديما يا ناس مضروبة بالحروفْ
يا كما خاصني ندبح دجاجة واللا خروفْ ؟

فْ نصاصاتْ اللِّيل إيفَيْقُوني و عليهم نطوفْ

واللِّيت الله يحفْظ ..كل قنتْ فْ داري بورقة و قلْمْ

ياكما مسكونة.. ذكرنا الله ونبِي.. واللاّ كَ نحلمْ ؟

ilham 16/03/2009

إلهام بُصفا · 04-04-2009, 11:27 PM

عتَرْ لساني

عتَرْ لساني و طاحْ فْ الحروفْ

مشى فالهضرة بلاما يْشوفْ

هبط الكلام القديم من الجوفْ

غير خوى المزيوْدة بلا خوفْ

واللاّ خاطرو هانِي و مرْخوفْ

19/12/2008 إلهام

إلهام بُصفا · 04-04-2009, 11:47 PM

سيد الزجّالين يا بنعيسى الحاجي يا خويا

كلامك زرابي.. خيوطها من الحروف الذهبية

تفرشها وجداني و غطّاتْنِي من الهموم اليومية

الدّاتْنِي عيني على حريرها الصافي و راراتْ بيّ

همدْتْ صداع ذاتي

زادتْ فْ حياتِي

نساتني فْ الآتي

حروفكْ لالا و مولاتِي

خويا بنعيسى الحاجِّي

سيرْ..سير حتى تْجِي

بنعيسى الحاجي · 04-05-2009, 08:24 AM

اقتباس : المشاركة الأصلية كتبت بواسطة إلهام بُصفا [ مشاهدة المشاركة ]

حروفي مالْها تجذب وتلالي ؟
خاصها الحرملْ ..البخور و الجّاوِي

الليف سيدهم واللاّ مسرار العيساوِي
طحت فْ حفرة الْيَ واجّا ما خرّجْنِي

من غيرْ إلى جذبتْ حروفِي قدّامي وْ تفرّجْنِي
ولى وقفت من الجذبة أيْ أيْ غادي تعرّجْنِي

الله يكون لك ف العون

يا مولات الحرف المسكون
فقيهنا فقيه قاري ونبيه
يقرا ويسرع السواكن اللي فيه
ويلا ما بغى ساكن ذاتو يخرج
نجيبوا لبخور
حصلبان والحرمل ، الجاوي والقطران
وشي طريف من لحدج
وبلا جداه يسلم يخرج
كان مسرح او كيعرج
ايوا اعطي لفتوح للفقيه
وﯖولي السلامة

:::

بنعيسى الحاجي · 04-05-2009, 08:50 AM

اقتباس : المشاركة الأصلية كتبت بواسطة إلهام بُصفا [ مشاهدة المشاركة ]

فِيَ دعوَة

فِيَ دعوَة.. ديما يا ناس مضروبة بالحروفْ
يا كما خاصني ندبح دجاجة واللا خروفْ ؟
فْ نصاصاتْ اللِّيل إيفَيْقُوني و عليهم نطوفْ
واللِّيت الله يحفْظ ..كل قنتْ فْداري بورقة و قلْمْ
ياكما مسكونة.. ذكرنا الله ونبِي واللاّ كَ نحلمْ ؟
ilham 16/03/2009

خممت مزيان ف لحروف
ﯖال لي مجاجي
ما تخمم ما اتعجب
لحروف ماهي ملاغا ماهي هتوف
وما كتحير ما كتجدب
لحروف دموع
ايلا ما بكات العين ما تحوف
قاسية ف مضاها
كتجرح
شلطتها امضى من اسيوف

إلهام بُصفا · 04-05-2009, 08:54 AM

السلامة ...السلامة
يا الفقيه واش عندك دوايا ؟

جيتك بحروفي تتحيرْ فْ هوايا

عطيني حرز واللاّ سبوبْ

من حروفي ما لقيت هروبْ

السلامة..السلامة

إلهام بُصفا · 04-05-2009, 09:03 AM

اقتباس : المشاركة الأصلية كتبت بواسطة بنعيسى الحاجي [ مشاهدة المشاركة ]

خممت مزيان ف لحروف

ﯖال لي مجاجي
ما تخمم ما اتعجب
لحروف ماهي ملاغا ماهي هتوف
وما كتحير ما كتجدب
لحروف دموع
ايلا ما بكات العين ما تحوف
قاسية ف مضاها
كتجرح

شلطتها امضى من اسيوف

دابا عاد يْهْنا بالي وْ نرتاح يا بنعيسى

أنت أحسن فقيه مانحتاج نزور الهادي بنعيسى

لقيتي لحروفي دواهم

دخلتي ..تعمّقتي ف جواهم

وْفهمتي الزمان اللي كواهُمْ

إلهام بُصفا · 04-05-2009, 09:44 AM

كلامك من عود لْقماري

تسلل وعطا ريحتُو فْ داري

نسّاني فْ عطور نوّارِي

ياريت كون كنتِ جارِي

نشركوا الطعام

نقشُوا الكلام

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري