نافذة خاصة بالردود الزجلية - الصفحة 16

عبد الغني الراقي · 08-13-2009, 09:23 PM

آش يغيّْر الحـــال
ويرخّْص دْموع الرِّجال
غير الهم إيلى طــال
و تْمادى في طولــو
-
دْموع الرجلة نخــوَا
وعزّْ راكب ف الذرْوَا
ودمعة وحْدَة تسْــوا
عرض لبحر وْ طولُـو
----------

الرابط : دموع الرجلة
عبد العزيز زكي

عبد العزيز زكي · 08-17-2009, 06:08 PM

ومضات جاوبوني يا صحاب الحرف للأستاذة الهام بصفا

مولات الزين و المقام
زينت لحروف ولكلام
جيتك اليوم بالتمام
جيتك ب لفقيه بولكمام
شريف ناس بوسلهام
يمشي على بيض النعام
يعطيك الحل بلا تخمام
ايوا سلمي و زيدي لقدام
زيدي..زيدي يامولات اللثام
زيدي..يابنتي باين لي فقلبك غمام
كلام.. واشمن كلام
وحيدة... بعيدة
شادة الطريق بلا حزام
حروفك شريدة وعينيك نيام
عندك غيار..؟ عندك خصام..؟
عند الخوف من ليام
كيف الموكا فالظلام
ماعندك تيقة فعش لحمام
فحياتك شفتي غير اللئام
حتى الكمرة لي عرفتي
لا عمرك فيها تقتي
وعليها شحال قلتي
بلي نور ليلها ..؟
كذوب ف الصباح
ياك ما كشفت ليك سرها
لقداح؟
أولا جاب لك خبارها النباح؟

---------

قربي وسمعي يا بنتي
الكمرة نورها ضباب
وحقيق حالها خراب
كومة لحجر و التراب
ولاكن محلقة فوق السحاب
مالكة نجومها بلا حساب
ودايرة لبحر ف لقراب
لانباح اطول مقامها
و لا الليل يطفي نهارها
ولا يلحقها خدش الناب
الكمرة بعيدة على نباح لكلاب
من قديم زمانها تعرفات
فسوق عكاظ الناس بيها تغنات
ليام والشهور
وبالكمرة عرفنا لوقات
سمعيني يا زينت لبنات
راني عارف قلبك كبير
وهبتيه لكل طفل صغير
محتاج لحنانك باش يطير
لا كن فكري راه لعمر قصير

خوي بالك من لوسواس
شوفي لك شي ولد الناس
اكون لك ظهر وساس
ويحد معاك لباس
ونصيحتي ليك يا زهرة لعراس
تخلي لمعدوم جارك
وتسدي باب دارك
صلي صلاتك وعطي زكاتك
تسعد حياتك
وذوقي مسك لختام

يا لالة الهام

عبد العزيز زكي · 08-17-2009, 06:16 PM

زجلية ما جرحنا ليك شعور للأستاذ عبد الغني الراقي

حروفك قَدِّي.. و لا كبر..؟
عيدي.. وعيدها يفوح زهر..
شهدة ب لمعاني.. عسل يقطر
كلامك جميل... روحاني

بحرك.. مواجو تتلأ لأ جوهر..
وغروبو.. كلام لوحة تسحر..
فغيوم ملبدة لونها يعَبَّرْ..
نسمة ..رعشت وجداني..

حروفك قَدِّي.. سحابة تمطر
فكل ضيعة تروي.. بقدر
فسماها اسمك مرفوع منور
سيدي... عبد الغاني

عبد الغني الراقي · 08-17-2009, 09:38 PM

ف الأرض تابْثة بينا لقــدام
وْلاحْقين السّْما بْعقل صْحيـح
رافْعين لكفوف وصايْلين لرحام

بْهمس خْواطْرنا دافْقة لقـلام
شارْبين لبحر وْ سافِّين الريـح
و ف قيعان التِّيه طايْحين رْوام

وْ ماحْنا غربان أو سرب حْمام
ماحْنا غير قلب ولْسان فْصيح
و اللُّومة على الحرف إِيلَى لام

بْالصّْبر وْصِّي المنخور بْسْقـام
و إِبْليس حْداه مْكسّْل طْريـح
ساجْنو ف دوَّامة طول الـدّْوام

مكحّْل قلبو ومسوّْس لعظــام
و حاطُّو ف إطار مْشوه وقبيـح
وراميه ف ورطة ومْكوبْس لحلام

صفِّيت وشْربت وبنّْنت الطّْعـام
وما تْعلّقْت فين نْتفلّق ونْطيــح
وما ثقت ف شْطارة موس الحجّام

تْراب أقدامك ما يرفض سْــلام
والود ف قلبو واسْع و فْسيــح
وتْشْغاب لحروف ما يْفرّْق تْــوام
*****
الرابط: فـينْ حْـنا ؟ إهداء الى الزجال عبد الغني

زايد التيجاني

عبد الغني الراقي · 08-26-2009, 06:36 PM

مال لبحر مْواجو هوجا
والحوت بالآدَمي شبعان
ولعقل حارن والوقفة عوجا
والسّْفينة تايهة بْلا ربَّان
-
لجناح مالو مْقصّْح كْسير
في خْلا خالي مجلي جايْح
مال الـمَخاض قاسي و عْسير
وعلاش لفصيح لْسانو طايح
-
علاش الهم ف كل واد يْصيح
وعلاش اللايم ما يْلوم نفسو
علاش المجدوب ما هزو ريح
ما طاوْعو كلام وقاطع حسو
*****

الرابط:مال الموجة عوجة

عبد الرشيد عمهم

قرميم سعيد · 08-26-2009, 11:30 PM

رد على نافدة خاصة بالردود الزجلية
شد رد زرع تحصد
هاك مد و جبد لا كاين شي ما تجبد
اللي جد وجد
و اللي قرا يرد
و اللي ما رد يمرض و المرض قرا و ما رد
اللي كلا يقول الله يخلف
و اللي شاف يعطف
و تعلوا نزجلوا شتف هايتف
و صف و صنف
و دير الصف حثى نوقف
ى -- -- -- -- -- -- -- -- -- -- -- -- -- -- -- -- --

عبد الغني الراقي · 08-27-2009, 12:37 AM

اقتباس : المشاركة الأصلية كتبت بواسطة قرميم سعيد [ مشاهدة المشاركة ]

رد على نافدة خاصة بالردود الزجلية
شد رد زرع تحصد
هاك مد و جبد لا كاين شي ما تجبد
اللي جد وجد
و اللي قرا يرد
و اللي ما رد يمرض و المرض قرا و ما رد
اللي كلا يقول الله يخلف
و اللي شاف يعطف
و تعلوا نزجلوا شتف هايتف
و صف و صنف
و دير الصف حثى نوقف
ى -- -- -- -- -- -- -- -- -- -- -- -- -- -- -- -- --

لا تكن المتسرع المندفع ... وحاول أن لاتُسخر السجع ..(السجع حويط قصير وأي إنسان بسيط يستطيع القفز عليه ..).
-----
أنت هنا في ردك على( نافدة خاصة بالردود الزجلية) قد ارتكبت خطأ لأنك لم تقرأ كل الردود ...وكان عليك أنت تقرأ المواضيع
التي ورد ت عليها الردود لعلك تستفيد قبل أن تشحد قلمك للنيل من الأشخاص أو من شخص معين.
وليكن في علمك أن الحرف يفرض نفسه على القارئ والنص الجيد وحده يستطيع أن يستفز المتلقي ليتفاعل مع مضمونه .
هات ما عندك وأخرج ما في جعبتك وللمتلقي الكلمة الأولى والآخرة وبدون أحقاد.
وحاول أن تبتعد عن هذه النافدة فهي ليست حلبة للتراشق .

مع كل التقدير والاحترام لشخصك.

عبد الغني الراقي · 09-02-2009, 11:04 PM

قطرة قطرا :
حْكاية ونْشاد
*
سالْت القطرا
فرحو لعباد
طْفات الْجْمرا
تْحلُّو لعْقاد
صْفات النّْقرا
خرْخْر الواد
حْلات العشرا
تْدكُّو لُوتاد
زهات الحضرا
تْبرّْعُو لجواد
تْشيّْخات لـمْرا
سفَّات لحصاد
طاحت الـجّْرَّا
بْرْهين لبلاد
ومشات البكُْرا
وبْقا لكساد
*
بقطرة بقطرا
يخْوَا البرَّاد
والمكْسي يتعرَّا
ويقْلال الزاد
بقطرة بقطرة
يْدور العدَّاد
وتتهرّْس الحجرا
ف قيعان الواد
.....

الرابط : قطرات مطرية

سعاد بني أخي

عبد الغني الراقي · 09-02-2009, 11:08 PM

مْرا و راجْل و راجل ومْرا
بْزوج مْشاعل و حاملين بذْرا
وماشي ساهل يغرسو شجرا
ويجمعو لـمْحاصل ويجنيو التمرا
-
اللي بغا يْحاول يحكّ الدبرا
يصبر ويْواصل ويْسايس العثرا
وبالحب الكامل يْصون العشرا
يْعلِّي لـمْنازْل بحجرة حجرا
تنبت لـمْشاتْل وتْفوح الزهرا
-
سعد الراجل بْمَصير لـمْرا
ولعمر مْراحل والشتا قطرا
----

الرابط :قطرات مطرية

سعاد بني أخي

عبد الغني الراقي · 09-02-2009, 11:53 PM

أهلا وسهلا بيك
ومرحبا بْلمْقام
والتسليم وخير وسْلام
-----
(س): ثْلْث سْنان
1- سْريسرا بلا زحمة
بلا حيا بلا حشما
2- سلة بلا عنب بْلا سدَّان
3-سوّْل موس الحجام
--
(ج) : اجمع واجغم...
اجري وجاري...
وتحكّم ف اللّجام
اللّْسان ما فيه عْظام.
عْظام الحوت إيلى ما قتلو يْمحّْنُو...
والمحنة ف التخمام.
دير الفوضى وزيد القدام
مزّْقْت لمعاني وفزّْقْت لكلام
التسليم وخير وسلام
والسلام.
*****
الرابط:حلمت في المنام خير و سلام

قرميم سعيد

أدوات الموضوع
مشاهدة صفحة طباعة الموضوع أرسل هذا الموضوع إلى صديق
انواع عرض الموضوع
العرض العادي الانتقال إلى العرض المتطور الانتقال إلى العرض الشجري