رد على تعليق أخي بنعيسى
حروفك جالُوا وسط حروفِي
فهمُوا وْقراوْا النار اللي فْ جوفِي
شافُوها تتحيّرْ على نغمة الغواتْ
شافُوا بير حياتِي اللِّي ماهْ برد أو واللاّ فتاتْ
جالُوا حروفك فْ حروفِي اللِّي عبْرُوا فْ اسكاتْ
سكاتْ ذاتِي الباكية عل الذّاتْ بجميع اللغاتْ
(2)
أنا حالي حال...فرّادِي فْ الدنيا غريب
ماتتمنّاه العاكْرة واللاّ البايرة يكون لها حبيب
حيّدْتِي قفالْتُو و قفّالُو..ذقتِي من مرقتو بالزبِيبْ
الزبِيبْ اللِّي كان عنبْ عامر لذيذ يْ برّدْ لْقْلِيبْ
زبيبْ ناشف من بكاهْ أو عمرُوا مايخناز ولا يْريبْ
زبِيب مشمّس فْ سطح مكناسْ بْ يْدِّينْ من الطِّيبْ
زبيبْ كان عنبْ يْشهِّي واللاّ ناشفْ وْ عامر شيبْ
عرفتي باللي قلبي يجدبْ ماشي حروفي يا الطبيب
(3)
غير صوطْ عليَّ الكلام المفتُولْ
فْ طبقْ جدودنا العامر معقولْ
صوط صوطْ كلام إيهدّنْ
ما يخرج حتى يتْوزْنْ
فْ قلبِي.. وْجدانِي سْكنْ
كلامْ إيراري.. منِّي تْمكّنْ
بلا عيشة واللاّ حمّو فِيَ سكنْ
رد على تعليق أختي سعاد
اللِّي بْ شعْرُو حايرْ بيه
يْقيّلْ إي حرّكْ وِيْلعبْ بيه
وِاللِّي ماعندُو ما ما يْوَرِّي وْ يْبَيّنْ
يْغطِّيه بْالقناعة أو عمرو مايْتعيّنْ
رد على تعليق أخي عبد الغني الراقي
هاكدا نبْغِيكْ يا خويا سيد الرجال
ما تغويك خالة النون أو خلخالْ
ما التِّيق فْ التّا المربوطة
ما الدّوخكْ إلى كانت مبسُوطة
غير بالعقل تضربها بْ صوطة
ها كدا نبغيك
تكون ماضي
وْ جنابْكْ حاضي
وْ بالقضاء راضي
دايرْ حسابْكْ من الكسرة وْ الضمّة
قضاتْ على ولادْنا غير بْ شمّة
وْتْفرْقُوا لْ حبابْ أو ما بقات لمّة
هاكدا نبغِيك يا ولد الأصل الصحيح
ما تمشي فْ خوا الخاوي واللاّ فْ الرِّيح
هاكدا نبغيكْ تفرش الرضا أو عمرك ما الطِّيح
رد على تعليق أخي إدريس الهكار التازي
سعداتْ حروفكْ بيكْ
عليها خايفْ أو هي ليكْ
تقيّلْ تقرا قراهمْ
أو هايمْ فْ سماهم
سعداتْ حروفكْ بْ حبيبها
هي طبيبتك وْنت طبيبها
ما عندك ربيبْ يشرب حليبها
سعدات حروفكْ بْ مولاها
كل دقيقة ف بالك ما تنساها
باز لعشيرتْكْ عل الحبيب الدّابزْ معاها
ذخّلْتِي عليها الضّرّا اللِّي تتعاند معاها
الدّاها وْ الدّاها وْ الله إيما خلاّها
سعداتك بالحروف الجميلة و المْتَوْلَة
أو باز لْعْشِيرتْك تكون عليك مهَوْلة
عنداك حروفكْ إينسِّيوْكْ فْ مراتك اللّوْلا
رد على تعليق أخي نجيب أمين
طاح الليف أب الحروف واش بقى ما ندير
خلاّ كلامي كلو يجدب من الصغير لْلكبير
على جناوْح الليفْ كنت بالفرحة نرقص وْ نْطير
مابغات حروفي تشري ولا تعيش بْ لِيف الغير
خلِّيها تجدب..تبرد نارها حتى الله يْجيبْ التيسيرْ
قول السلامة وْ التسليم آ نجيب أمين يا قدام الخير
(2)
وِلى طاح الليف
آش قضيتْ بالحروف؟
هو العزْ والنِّيفْ
هو العين باش نشوف
حياتي كلها خريف
وكلامي واحل ف الجوف
(3)
ربي مولاي...ربي مولايْ
عمّرتْ فمِّي أو قلبي بْ مولاي
من غير الحبيب ربي ما عندِي شايْ
نحمدو عل اللي فات و عل اللي جاي
أنا متّايْبَة لله الواحد...الخالقني
راضية بْحُكْم العالي...الرازقني
الليفْ دْ الله عزيز أو غالي
هو النور باش نشوف ف الليالي
الليف دْ الله بيه واقفة و عليه التّكِّيتْ
على الليفْ د الله ركعت وْ التحنيت
هو فاش شادّا...أو عمرني ما نطيحْ
مدرقْني من الصمايْمْ ..الخوا وْ الريح
بْ الليف دْ الله بنيتْ حياتي وْ ساسي صحيح
(4)
كلامك ما يْتعد
ولا عمرو يتحد
بيه تشوف السعد
و تكون حياتك كلها ورد
إنشاء الله ينوّر لك الغدْ
(5)
يكفيني نكون لحروفي خادْم
عبدة مشرطة الحناك
مابي جاه ولا باغا نولِّي حاكمْ
خليني غير قطرة ف سماك
مابغيتْ ضواوْا والله اللي عالمْ
خلِّيني مغطية بْ غطاكْ
(6)
أنت كريم ولد الدار الكبيرة يا نجيب
تفرق الحروف الجميلة على كل حبيب
عطاك الله الحرف أو عمرك ما تخيب
أنت غير مسجل في منتدى مطر . للتسجيل الرجاء إضغط هنـا
آخر 10 مشاركات
رد على صروف الميزان
العرض العادي
