ماشي
ف طريقي لشيخي
شدني الحال
بياضت العين
الفم
على جهة عواج
بغيت نهلل
مضغت لساني .
الركبة خوات
الجهة علاش طحت
سلمات
لكلام اللي بغيت نلقاه
لقاني.
النهشة نفخات . . .
الرعشة سكنات . . .
القلب علاش كنت عوال
وصل بين سناني .
راسي ما عاد راسي
خلِّيت التراب
فوق التراب مشبوح
ف بير ظالم سحيق
نزلت الروح
العكاز و النعالة ف جهة
ف جهة
لمزود مليوح .
هجر الساكن المسكون
للسما
عرج المسجون
حضر الحال .
آه يالدنيا
اللي بغاها ﯕﺎع
يخليها ﯕﺎع .
الدنيا
عبدة !
عند النخاس
ف سوق الدلالة
النهار حايك
و الليل قفطان للباس
لغروب شوكة
و لفجَر خلالة .
عيب الدنيا
بالفلس تتقاس
لمول المال. . . تتدلل
ف عين المعدوم
حبَّة و جلالة.
ف حجر مول الصنك
اﻟﯖﻌﺪة والنعاس
البزّة تحت الراس مخدة
و الطمع ف الليد نبالة .
كن الدنيا حرة
ما تفصل من الحرير حلاس
ما تلبس المسكين نعالة .
ِلك الله أ مسكين ! ! !
الدنيا غزالة
واقفة
ونا خيال هارب
راكب ذنبي
قبري جنبي .
الموت. . .
قُرطاسه
نهار زت خرجات
تطلبني وسط سربي.
التراب للتراب راجع
هاذ لقصور
خراب ف خراب
الموت حق ساطع
شراب قاطع
هاذ الدنيا
سراب ف سراب.
بالحق
اللي بغاها ﯕﺎع
يخليها ﯕﺎع ! !
شوف . . .
واحد
ﺑﯖﺼﺒﺔ و بندير
فيها هايم
واحد
صاري واقف
ما صاب شراع .
واحد
ف كبة ت الشعر نايم !
ما عاجبو تقلاع
يحلم برجوع الكلمة
للسيف و الذراع !
واحد . . .
كشكوشة
ف عرق خوه عايم
وارث الفوق
ما خاف يسكن القاع .
الدايم الله
الدنيا
كذبة قديمة
لباسها الصدق.
الدنيا شربة
بنينة عذبة
بالحق. . . معجونة بالحق
فين الحق ؟
الحق
وسط شمعة
تكون فتيلة
و تشعل مع راسك !
للفوق تهز راس غيرك
مفهومة. . .
هذا هو الحق !
لمكحلة
فوق الصخرة مصوبة
انت الحبة
و البارود راسك
Nokia الزناد !
النجمة الميعاد
ساهلة مفهومة
هذا هو الحق .
سلاح المقهور
تكون سم
ف راس الحربة
طعم وسط النشبة
جنب طريق
و لا داخل خربة
ما يهم
الهاجم إموت شرع
هذا هو الحق .
ف الأرض
شوكة ف طريق العدا
ف السما
كن برق
كن رعدة
ف الماء
كن حمى
كن مرضة
اضرب تحت لحزام
منك مقبولة
فهمنا علاش
هذا هو الحق .
عريس اليوم
أنت شروق غدا
انت الحق
الموت فيك عسل شهدة
بالحق ما عندنا زهر
جينا ف زمان الذل
الخط
فرَّق لقبايل
لغريب
شعل لفتايل
عقَّد لمسايل .
نهار كانت الدنيا
بالدافونية و لكتاف
ﯕﺎل بن خوك كلمته
اليوم
نص الفَرڴ ضرير
- ما شاف والو -
عايش ف الظلمة بهيم
الربع عْمش
دﯕﻮ قديم
بُعد النظر بين رجليه
الباقي للسلف خديم
ف السن صغير
و القلب شارف.
أنا عمرت بالكلام
و الكلمة
طايبة سخونة
مدفوعة باﻟﺤﯖﺮة
ما مقفية
ما موزونة.!
لغريب ذبحني ولحس الساطور
انتقم لجدوده .
الكلبة المسعورة
تاكل ف جنابها
ﯕﺎعدة ما ف خير
واقفة ما ف خير.
شاخ فيك العز أ ميِركان
بالحق
نهار نحللوا الذيب
و لاّ نحرموه
يرجع الشغل كِكان .

ورزازات صيف 2005

السلام عليكم و رحمة الله تعالى و بركاته اخي نجيب امين.
ها بوجور

السلام عليكم اختي لميس.
الف شكر على التفاعل الجميل و التوقيع البهي. كل المودة.

السلام عليكم و رحمة الله تعالى وبركاته سيد ادريس التازي.
الف شكر لك يا طويل القامة و غارق
لعروق.

السلام عليكم و رحمة الله تعالى وبركاته سيدي زايد.
الحرف خليلي و خليلك.
و المعنى لجميل سليلك.
الله يحفظك يا حكيم.