- نموذج من كتاباتك
-
كيف البارح كيف اليوم
قست زماني
لقيت راسي ... كيف كنت كيف ما نكون
الفرق بين البارح واليوم ... ثقة رخاصت فالسوم
حتى بنادم تاه فاللوم ... كـِ.فياقو كـ.جاه النوم
خوفي من بسالة ... لبسات شلا زواق
خوفي من حروف ... قراية باعت لوراق
خوفي من عشق ... تالف عريان فلسواق
قال الراس اللي ما يدور كدية
قلت فيني وفين الكدية
أنا مازال نقلب على حجر الساس
رشيت الملحة ... زدتها على ملحي
غسلت جلدي ... طاب قديد
وتهنيت ... من خرايف التهمة
التخمام زينة لفاهمة
إلى غلطتي ترجع عليك بالندامة
قلتها أنا
قبل ما يقولوها شي عولاما
تلف الزمان وتلفو مواليه
تلف العالم وتهرسو سواريه
تلف الصبر فالحكان
اكثر لقميش والعضان
تلف العاشق والولهان
وتباع لغرام وولى عرام
أخايت أخايت
ثيقة درتها فالخوت ... التبسيمة وشلا بهوت
أخايت أخايت
الظفر ينعت نعوت ... والقلب عرقو منكوت
أخايت أخايت
خاوة درتها فالخوت ... نساو نهار يفوت الفوت
إدريس الهكَار التازي
